Hûrşîd Kim Fezâ-yı Felekdür Mesîr Aña- Baki

Hûrşîd kim fezâ-yı felekdür mesîr aña
Degmez gedâlar içre işigüñde yir aña

Takdı hilâl halkasını gûş-ı hidmete
Oldı sipihr bende-i fermân-pezîr aña

Yüz sürmez idi südde-i devlet-me’âbına
Kul olmayaydı husrev-i gerdûn-serîr aña

Görmez misâl-i kâmetüñi çeşm-i râst-bîn
Ahvel baka meger ki görenler nazîr aña

Bâkî suhanda fark-ı sipihre kadem basar
Lutf-ı Hudâ olursa eger dest-gîr aña